有樓在手，再等五年

小胡 Blog - Yahoo! Blog from 小胡 http://blog.yahoo.com/scarlett.wu/articles/670914 阿仔鍾意食魚，咪日日買條活魚囉，日子有功，同賣魚婆ｆｒｉｅｎｄ咗。佢好嘢，當年深夜十一二點去排隊搶購西環泓都，老公趕唔切來，叫佢用自己名簽咗先，結果就好好彩，抽中個靚單位，到去銀行做按揭時，銀行話，喂，你西九又有層四小龍，同一時間供兩層，唔得噃，減一層啦！佢又老實，就放咗西九果層，留低泓都。我話：乜咁啱嘅，當日經紀ｃａｌｌ我，可惜做緊嘢行唔開，（當時做緊財經地產版編輯，十一二點埋緊尾，未收得工住），錯過咗，真係可惜，我都睇中泓都呀！應該好收租呢！ 於是兩個女人成日八卦ｄ買樓租樓經。一見面，賣魚婆就向我打雀眼：喂，租金升囉！ 我又會大聲話佢知：你層泓都過萬蚊／呎啦，冇萬五都唔好沽呀！賣魚婆喜笑顏開。 早兩日經過佢檔口，佢大聲話：再多五年啦，五年後樓價冧啦。我同意：有道理。 噚日晚飯後，同蝦子餅正在海邊散步，女友小蔡打電話嚟：喂，小胡呀，我想賣層自住樓，你話而家樓價到頂未呀？ 我咪執賣魚婆口水尾：咪呀，等多五年添啦！ 小蔡急：但你睇，報紙個個都話樓價要跌噃。 我答：報紙講你又信？幾間大報的地產版阿頭，全部都係我１８年前的舊同事，果個小明，由０２年至今，年年叫人唔好買樓，叫晒成個家族的人沽樓，成為討論區大笑話啦。地產版阿頭有幾層樓收租的，有幾多個呀？點解見唔到佢哋寫下收租故事呢？你信佢哋？我就由０２年至１２年，十年間冇停過叫大家買樓，話時話，呢十年，ａｎｙｔｉｍｅ你上車，都有錢執呀！買樓嚟講，這是最好的十年！以前財經版記者，又係，你都有眼見，叻果ｄ，走晒啦，老老實實坐響度果ｄ，咪打份牛工，供樓供到氣咳囉！拿，威爾信你識架，你知佢點架啦，做咗十六七年財經版阿ｈｅａｄ啦，咪同兄弟分租囉！叻果ｄ，譬如阿添，財記新仔，大陸落來一年，即刻撇啦，話炒股票賺夠，唔使做咁話；我仲有冇做嘢呀？一早收山啦，係度打牛工果ｄ，紙上談兵，唔好信呀！做報紙佬，工作時間咁辛苦，女人做到四十，男人做到五十，再做落去果ｄ，九成都係財務唔掂的人啦，做社長老總果ｄ另計。捱都捱殘啦，幾多行家五十幾歲冇咗。我而家明白啦，打工真係唔會發達咯，畀幾萬蚊人工你，做死你呀！但係我用錢搵錢，輕鬆到極。樓價升，一年帳面入幾百萬閑閑哋；想同自己加人工，咪加租囉！每個租客加幾千銀，ｅａｓｙ　ｊｏｂ啦，佢唔ｏｋ咪搬囉，租畀第二個，又加多ｄ添噃！加租一年都加兩成幾，打工幾時先至有呀！你話，你係信報紙果班好霉的舊同事呀，抑或信３８歲退休的我呢？ 哈哈。 講真，樓價升唔升，要睇市場，眼前供應少，需求大，０８年賣樓後等樓價跌的一批人，個個持有數百萬過千萬現金，只要這群真正需要的人一日未上車，樓價一日未升完。 小蔡同意：咁又係。我信你。你話，我應該點做？ 我勸佢：你自住層樓，要慎重。０８年有好多人叻唔切，賣樓等跌呀，結果愈升愈有，班人兩頭蝕，眼見樓價唔見一大截，租金又食去一大截，真係慘情。 小蔡話：我想賣咗層樓，返大陸買鋪。 我：而家樓價到頂了，可以賣，但我唔主張你賣的原因係，你的夫妻關係有問題，一旦賣樓，好容易令到個家散咗。唔係唔畀你賣，而係你的情況唔可以賣。夫妻恩愛，我話之你呀！而且，都要考慮你們夫妻的年紀，供樓的年期等等。賣咗樓，下次再供，仲有冇條件呢？你老公年過五十了，是要考慮部署退休，而不是進取炒樓啦。要搞清楚自己條件。銀行借錢畀你都審慎得多呀，借唔到三十年啦，至多十五年咋。諗清楚！ 好多朋友，人在江湖，忘掉了光陰匆匆，自己忽然間已是人到中年，很快就"夕陽無限好，只是近黃昏"。我早在１８歲時，讀過美國財務專家的著作，很強調一點：人在四十歲，是必須規劃退休的時候了。 香港人，很多四十歲才結婚，五十歲才生子，完全罔顧自己的年齡對下一代的不良影響，以及自己的晚年退休生活。香港人好可憐，是全世界唯一沒有退休保障的，退休＝失業，沒有退休工資，靠自己的財務策劃來安排晚年，政府不管，而千多二千元的生果金，真係只夠買生果的，唔夠食飯穿衣交友睇戲旅行散心的！但好多人唔明白，四十歲人還在憨居居做人。 一語點醒小蔡：你老公的公司，退休年齡是５５歲，你老公只剩五年的時間安排退休後的財務，你覺得你們還可以再折騰嗎？如果可以，請繼續；如果不，你要重新考慮。其實你可以把樓按給銀行，借百多萬夠返大陸買鋪就ｏｋ，不必又賣樓再買樓咁麻煩。明未？ 她恍然大悟，答應回家再同老公商量。 做得夫妻，不同心同德，損失的是自己。必須同舟共濟，才能"家和萬事興"。

Put the internet to work for you. via Personal Recipe 673252