| To share what i see... from NetBugs http://netbugs.hk/2012/11/30/1859/ IFG成日話，旺角住唔起咪住荃灣，荃灣住唔起咪住大埔。佢講緊o既係香港人要面對o既客觀事實，但對於呢種"將就文化"請恕我未能苟同。"將就文化"箇中涉及o既經濟理論(包括聯匯)同因果關係在此不多談，事實係，如果一個人做死一世工，人工勉強同通漲同步，但居住環境越來越遠越來越差，而成個社會數以十萬甚至百萬人都同呢一個人同病相連的話，咁呢個社會就肯定係有o的問題。基於呢個事實，我覺得香港人想買樓呢個諗法唔會有錯，但如果政府同香港人有相同諗法的話就大錯特錯，因為現有幫助置業方案只會令樓市繼續升，如果我話政府係好清楚呢點，咁即係話，政府其實從來無諗過點樣幫香港人安居樂業。你可以話，做死一世工o既人無志氣，但我認為，呢個社會正正就係靠唔同人做死一世唔同工種會運作，如果個個都走去做李嘉誠，咁邊個去劏雞? 邊個去派信? 政府無責任令個個變李嘉誠，亦無責任幫人置業，但最低限度要俾市民有尊嚴地過生活，而顯然地現屆政府所做同我岩岩所講正正係相反。 講返正題，雖然我o係香港對於"將就文化"唔多妥協，但只要一出香港以外，我就無乜所謂，會選擇妥協，因為妥協極俾盡都係幾日之麻，不過今次真係頂唔順。上星期過大海，發覺交通比年頭過澳門又擠塞o左些少。話說小弟諗住由金沙城附近去澳門美食節(即係旅遊塔附近)，COD班車Shuttle啱啱走o左，Fine，我地轉搭的士，的士排成個鐘都未必有，Fine，走o左去搭巴士。明明水牌話三個字一班o既車最後足足等o左半個鐘，o係呢半個鐘裡面，有兩個比我等o左更耐o既日本旅客最終放棄等巴士行返去酒店，而正正因為佢地放棄，我先可以o係巴士到站時僅僅上到車(其實門都爭o的閂唔到，但係當一個人落住雨呆企o左半粒鐘o既時候，真係無乜o野係無可能)，o係車程途中，巴士途經氹仔碼頭同機場，由於無人落車所有亦都無人上到，睇見o的旅客o既無奈表情都戥佢地慘。最後o係某個站突然成班人落晒車，如果無估錯應該係巴士總站附近有工人啱啱放工，然後全部搭曬巴士所以攪成咁。點解地盤唔提供Shuttle，又或者巴士公司唔加密班次? 呢o的問題我相信並非個別例子。 澳門公共交通問題唔係近期o既事，以澳門一個咁細o既地方，無理由咁多人都自己渣車，之但係如果搭車咁困難，咁渣車又係無可口非喎，就係咁形成惡性循環，仲未計依家酒店越開越多，一間新酒店最少兩三條Shuttle線，路就都係o個條，但係車就越來越多，咁死硬啦。其實澳門政府應該要同酒店傾下限制Shuttle數量，例如COD，銀河同金沙系酒店，其實o的酒店根本就係o係一齊，但係就分開o左N條Shuttle，類似o既合併減少車流應該可以舒緩交通問題，加密巴士班次同繼續增發的士牌都係提升市民使用公共交通工具誘因。講多一次，澳門政府年年派錢，疊水成咁，真係無可能攪唔掂交通呢o的基本o野。
講完掃興o野，講番美食節，據了解美食節每年參與商戶都大同小異，不過如果未去過就一定要去下。場內主要都係即食，基本上擺得o係美食節o既都有間鋪o係澳門，好食的話日後可以去落鋪Encore，而美食節正正係一個好機會俾你o係一個細Area內試曬咁多澳門美食。按道理香港美食唔應該差得過澳門，但係香港攪親呢o的夜市(年宵同工展會)o的o野食都係難食到不堪，唉!!總括黎講，美食節整體水準唔錯，最好多幾個人去，唔係試黎試去都係o個幾樣。不過呢o的大型盛事總係有o的害群之馬。有一家店賣$5一份牛扒，行過去見到無乜人幫襯，偶爾見到有人買到一份都有六七塊，兜o左個圈行返轉頭，開始多人幫襯，正當想買之際，我見到前面買o的人由一份有三四塊到最後o個個人只係一份得返一塊(最後o個個企o係到呆o左幾秒)，可能我係有o的吹毛求疵，不過o個間店銷售手法實在有點兒那個。 其實澳門係一個好地方黎o既，至少仲有要俾人行到o既商場，仲有好多小店選擇。不過眼見手信街開o左Starbucks，成條街都唔同曬，實在有點唏噓，唔係晃記其實我已經唔會再去。手信街要有乜原素我唔識答，可能係自由市場決定，之但係香港有個失敗中o既典範 - 昂坪市集，我諗一個無上過去市集，又唔諗住行上大佛o既旅客實在好難接受到千里迢迢上到山原來係幫襯七仔，Starbucks，滿記，係咪黐Q線架，駛唔駛開埋Zara同H&M? 澳門，真係唔好步香港後塵，希望輕軌攪掂之後交通會有返些少改善啦。 | |||
| | |||
| | |||
|
沒有留言:
張貼留言