[表揚C字台]天地線重臨香江

To share what i see... from NetBugs http://netbugs.hk/2012/11/21/1844/ 近年香港興懷舊，唔係收藏o的乜o野奇珍異物，而係渣住支龍獅旗"吊吊揈"。即係咁，如果咁樣俾人話攪港獨，遲下廿三條立法俾人秋後算帳你話幾唔抵呢? (唔好話無可能，講LAW我淨係信梁愛詩同胡漢清!!)。其實懷勉Good Old Days有好多種方法，唔駛下下攪疑似港獨o既。 正當大家除o左訓覺之外，任何時間(包括去廁所同攪o野)都渣住部電話之際，o係十九幾年前，電話仲係用黎講電話o既年代，香港曾經出現過CT2呢樣產物。呢類電話只能打出不能打入，仲要o係特定地方用，同依家Wifihotspot一樣，好多七仔門口都會掛個"天地線"，"步步通"LOGO，簡單o的黎講，與其話係手提電話，不如話係流動電話亭。依家o的八九十後可能覺得有o的不可思議，但係當年和記靠"CALL機收CALL，天地線覆CALL"搵到唔少錢。各位如果想回味一下當年點樣"情深說話未曾講"，依家有機會喇!! 由上星期六起，只要你用C字台，又咁好彩買到部iPhone5。只要按指示更新電信業者設定，你部電話就會搖身一變成為"野外定向版CT2″。以前天地線有定點覆蓋，呢個野外定向版CT2無話邊到一定收到，收到可以收唔到，收唔到又可能收到，收得到又唔一定上到網，比凌凌漆支古惑的槍更過癮。"沒有服務"，係咁架啦!! 有服務打入飛留言，好~出~奇~呀? 講到Good old days，又點少得撥號上網，用Gozilla同GetRight 上hk007 同boxup Download mp3，三姑六婆打黎屋企攪到上網斷線o既坎坷日子(無幾多家庭會特登申請多條電話線用黎上網咁奢華)。我永遠都唔會忘記當年用o左千六蚊買o左部Hayes 28.8Kbps Modem。重點係，當時其實已經有36.6Kbps上網，幫襯網上行o個陣個Sales話：28.8Kbps"穩定o的"。如果今時今日個Sales同你講1Mbps "穩定o的"，我相信個Sales唔方唔俾人Boxup喇。但潮流呢樣o野係會逆轉o既，好似近年都仲有石丹理咁o既地球生物同你講"56K上網夠曬"。嗱，C字台就Catch到呢個潮流喇，2G變3G，3G變4G，點樣可以快o左，同時又慢o左？我諗速度都係用黎…參考下架o者!!慢過C字台4G，無間得o羅。 講到尾，C字台其實只係想話俾你地聽，電話係用黎講，唔係用黎篤o既。你杯Starbucks有乜__好影？你個火腿通粉有乜咁__緊急要Up上Instagram？慢o的又要屌，收唔到又要屌，你地班暴民日日淨係識得o係度Complain，Complain，Complain。 香港碩果僅存o既文化人胡恩威曾經o係回應"亞視鬧劇"時多次提出大意為"依家香港社會，大聲就啱晒"o既論述，我完全認同。因為我地都明白，中國人係唔應該有，亦都唔需要有任何宣洩渠道，一黨專政完全體現中國速度。正當美帝班傻仔排幾個鐘隊投票選總統，中國人只需安在家中一早扭開電視機就知邊個掌控中國未來十年。只有美帝先有好似奧巴馬咁笨柒o既總統開個We The People俾民眾聯署倒自己台，我地香港市就唔同喇，高官全部A字膊，有鑊一定"唔知"，"唔關我事"，"無聽過"，然後繼續用納稅人o既錢出糧比自己，仲要話自己係義工，完全體現回歸後新香港精神。 其實點解做人唔可以正面o的? 點解一定要好似人民力量咁炒炒鬧鬧? 好似前排班怪獸家長，將洗腦教育標籤為洪水猛獸，完全扭曲洗腦目的。佢地明唔明，我地呢一代o係香港之生活得咁痛苦就係因為我地覺得個政府貪腐，社會又不公，阿爺又唔係咁想你班友仔有民主，如果下一代可以覺得貪腐，不公，無民主o既社會都無問題，咁佢地人生係咪會快樂好多呀? 點解你地一定要逼下一代去做Neo? 你點知佢地唔係想做Cypher鋸靚扒? 陳惜姿叫政府"撤"並唔係為下一代著想，係令下一代活在痛苦。 同樣，網上班暴民，成日話個電話收唔到，上唔到網，點解唔可以試下理性o的咁睇? 邊個話俾o左月費保證一定講到電話? 邊個話有Signal一定上到網? 家居寬頻尚且可能有八成網速保證，但係流動上網係無o既。OFCA有監管? So what? 亞視都係OFCA管喎!! 俾o左十二蚊隧道費就代表隧道上到網?你睇清睇楚o個十二蚊係乜黎先講啦。既然部iPhone唔係你個心臟，你o的血管又唔係黐住部手機，用少一陣駛唔駛死先? 香港人，睇開o的啦。

Put the internet to work for you. via Personal Recipe 673252